Heimir Örn Herbertsson hrl. og Hulda Árnadóttir hdl. lögmenn hjá LEX rituðu kafla í bókina Getting the Deal Through – Merger Control, sem var nýlega gefin út af Global Competition Review. Í bókinni er að finna yfirlit yfir samrunaeftirlit í 73 löndum og er þar m.a. farið yfir helstu atriði löggjafar hvers lands, t.d. um hvenær þurfi að tilkynna samruna, tímafresti sem gilda um tilkynningar, möguleg refsiviðurlög, íhlutunarheimildir stjórnvalda, heimildir til að bera mál undir dómstóla og hverjir geti átt aðild að slíkum málum.

Nýtt fagsvið hefur tekið til starfa hjá LEX sem kallast Stjórnskipunarréttur og mannréttindi. Sérfræðingar stofunnar hafa til langs tíma veitt einstaklingum og fyrirtækjum ráðgjöf um hvers konar álitaefni sem tengjast þeirri vernd sem ákvæði stjórnarskrárinnar og Mannréttindasáttmála Evrópu veita.
Þau verkefni sem LEX hefur tekið að sér á þessu sviði varða meðal annars vernd eignarréttinda, atvinnufrelsi, rétt manna til að standa utan félaga og réttinn til að njóta réttlátrar málsmeðferðar. Þá hafa sérfræðingar stofunnar umfangsmikla reynslu af rekstri meðyrðamála þar sem reynir á mörk  tjáningarfrelsis og friðhelgi einkalífs. Jafnframt hafa lögmenn LEX rekið kærumál vegna brota gegn Mannréttindasáttmála Evrópu fyrir Mannréttindadómstól Evrópu og veitt almenna ráðgjöf um rekstur slíkra mála.

Þann 11. október sl. lauk skuldabréfaútboði hjá Eik fasteignafélagi. Útgáfan, sem var um 11,6 ma.kr., er sú stærsta á Íslandi frá árinu 2008 og veitti LEX ráðgjöf við útboðið. LEX hefur jafnframt tekið að sér hlutverk veðgæsluaðila (e. Security Agent) í útgáfunni. Um er að ræða nýja þjónustu hjá LEX og er ekki vitað til þess að aðilar utan bankakerfisins á Íslandi hafi tekið þetta að sér áður. Hlutverk veðgæsluaðila felst í því að gæta að hagsmunum skuldabréfaeigenda og hafa eftirlit með því fasteignasafni sem sett var til tryggingar skuldabréfaútgáfunni. LEX mun þannig hafa eftirlit með eignatilfærslum, bankareikningum og sjá til þess að önnur skilyrði skuldabréfaflokksins séu uppfyllt. Þá mun LEX halda fundi skuldabréfaeigenda eftir þörfum t.d. vegna skilmálabreytinga og sjá um innheimtu skuldabréfanna komi til vanefnda.

Eins og sjá má hefur ný heimasíða LEX farið í loftið.  Tilgangur heimasíðunnar er fyrst og fremst sá að gera kaupendum að lögfræðiþjónustu betur kleift að kynna sér starfsemi lögmannstofunnar.  Við kaup á lögfræðiþjónustu er að mörgu að hyggja enda hafa kröfur sem gerðar eru til lögmanna í dag breyst um margt og liðnir eru þeir tímar þegar að einn slyngur lögmaður gat sinnt öllum þörfum viðskiptavina sinna.
Nú á dögum er sérhæfing innan lögfræðinnar, eins og reyndar á við um flesta sérfræðiþjónustu í þjóðfélaginu í dag, orðin meiri og til þess að geta veitt fyrirtækjum og einstaklingum afburða þjónustu er krafist sérhæfingar á öllum sviðum lögfræðinnar.  Í takt við þær kröfur er LEX afsprengi samruna þriggja lögmannstofa þar sem saman koma þrautreyndir sérfræðingar á nánast öllum sviðum lögfræðinnar.  Á nýrri heimasíðu kynnum við þau fjölmörgu starfssvið sem til staðar eru á LEX auk þess sem við kynnum þá eigendur lögmannstofunnar er veita sérfræði þjónustu á viðkomandi sviðum.  Með þessum hætti er viðskiptavinum gert auðveldara með að velja sér lögmann.
Það er von okkar sem störfum á LEX að með nýrri heimasíðu þjónustum við okkar viðskiptavini enn betur en áður og að hún geri þeim sem þurfa á þjónustu lögmanna að halda lífið auðveldara.

Þann 29. maí sl. birtist grein í Fréttablaðinu eftir Ásgerði Ragnarsdóttur og Huldu Árnadóttur héraðsdómslögmenn á LEX um samræmi frumvarps til nýrra heildarlaga um stjórn fiskveiða við stjórnarskrá og alþjóðaskuldbindingar. Í greininni er gagnrýnt hversu rýr umfjöllun er um samræmi frumvarpsins við stjórnarskrána og bent á að umfjöllunin sé að ákveðnu marki villandi.

Vakin er sérstök athygli á því að í frumvarpinu er hvorki minnst á Mannréttindasáttmála Evrópu, sem veitt hefur verið lagagildi, og þau sjónarmið sem fram hafa komið í dómum Mannréttindadómstólsins um vernd atvinnuréttinda.  Aftur á móti er áhersla lögð á álit mannréttindanefndar Sameinuðu þjóðanna í svokölluðu Fagramúlamáli.

Í greininni er bent er á að ákveðins misskilnings hafi gætt um eðli og inntak þessa álits en nefndin nýtur ekki stöðu dómstóls og álit hennar eru ekki bindandi að þjóðarétti. Fyrrgreint álit er auk þess í andstöðu við dóm Hæstaréttar í svokölluðu Vatneyrarmáli. Hins vegar hefur Mannréttindasáttmálanum verið veitt lagagildi, sbr. lög nr. 62/1994, og Mannréttindadómstólnum verið falið það hlutverk að kveða upp dóma um brot gegn ákvæðum sáttmálans, sem eru bindandi að þjóðarétti. Þá hafi Mannréttindadómstóllinn talið atvinnuréttindi njóta verndar sáttmálans og lagt áherslu á þýðingu lögmætra væntinga sem eru til þess fallnar að takmarka möguleika á skerðingu atvinnuréttinda með lögum án þess að bótaskylda stofnist.

Telja höfundar greinarinnar umhugsunarvert að í frumvarpinu sé vísað til álits nefndar sem starfar á grundvelli ólögfests þjóðréttarsamnings en alfarið látið hjá líða að fjalla um þá vernd sem atvinnuréttindi njóta samkvæmt Mannréttindasáttmálanum og þeirra skyldna sem hvíla á íslenska ríkinu í því sambandi.