María Kristjánsdóttir hefur verið ráðin sem framkvæmdastjóri GH Sigurgeirsson Intellectual Property, sem er sjálfstætt dótturfélag LEX á sviði vörumerkja- og einkaleyfaréttar.

María lauk ML gráðu í lögfræði frá Háskólanum í Reykjavík 2007 og LL.M. gráðu í alþjóðaviðskiptalögfræði frá Fordham háskóla í New York 2008. María er lögmaður með leyfi til reksturs mála fyrir héraðsdómi og hefur starfað hjá LEX frá árinu 2008, aðallega á sviði hugverkaréttar, samkeppnisréttar og persónuverndarmála. María hefur samhliða störfum sínum hjá LEX sinnt störfum fyrir GH Sigurgeirsson frá haustinu 2018 þegar LEX tók yfir starfsemi fyrirtækisins, þar af sem aðstoðarframkvæmdastjóri frá mars 2019.

María tekur við framkvæmdastjórastöðunni af Huldu Árnadóttur, sem tók við embætti héraðsdómara við Héraðsdóm Reykjaness fyrr í mánuðinum.

Erla S. Árnadóttir, lögmaður og eigandi á LEX lögmannsstofu skrifar grein í Markaðinn, fylgirit Fréttablaðsins, í dag þar sem hún fer yfir eitt þeirra atriða varðandi vinnslu persónuupplýsinga er hafa þarf í huga í tilefni af brotthvarfi Bretlands úr Evrópusambandinu. Bresk lög kveða nú á um að ábyrgðar- og vinnsluaðilar vinnslu persónuupplýsinga sem ekki hafa staðfestu í Bretlandi þurfi í vissum tilvikum að tilnefna fulltrúa gagnvart þarlendum persónuverndaryfirvöldum. Íslensk fyrirtæki sem vinna með persónuupplýsingar um breska aðila ættu að kanna nánar hvort skyldan eigi við um þau.

Erla S. Árnadóttir (erlas@lex.is) getur haft milligöngu um frekari ráðgjöf varðandi ofangreinda skyldu.

Rafrænir hluthafafundir, að hluta til eða í heild, geta verið ákjósanlegur kostur. Kristín Edwald, lögmaður og eigandi á LEX fjallar m.a. um heimild til rafrænna hluthafafunda skv. lögum nr. 2/1995 um hlutafélög, rafræna framkvæmd og aukna almenna þekkingu á fjarfundarbúnaði í Áramótum, tímariti Viðskiptablaðsins og Frjálsrar Verslunar.

Lára Herborg Ólafsdóttir, lögmaður og eigandi á LEX skrifaði grein í ViðskiptaMoggann þann 23. desember sl. sem fjallar um vernd uppljóstrara en ný lög nr. 40/2020 taka gildi nú um áramót sem ætlað er að vernda alla starfsmenn, opinbera og aðra, sem greina frá upplýsingum eða miðla gögnum í góðri trú um brot á lögum eða aðra ámælisverða háttsemi í starfsemi vinnuveitanda þeirra. Lögin skylda fyrirtæki með 50 starfsmenn eða fleiri m.a. til að setja skýrar verklagsreglur þar að lútandi.

Birgir Már Björnsson, lögmaður og eigandi á LEX fjallar um erfðamál í Viðskiptamogganum í dag. Í nýlegum dómum Hæstaréttar í málum nr. 7/2020 og 8/2020 reyndi á samspil heimilsfestisreglu íslensks erfðaréttar og bandarískra reglna um tiltekið form sameignarréttinda, svokallað joint tenancy with a right of survivorship (JTWROS). Niðurstaða Hæstaréttar var sú að víkja frá heimilisfestisreglunni og láta réttarstöðu þess í stað ráðast af lögum í hinu erlenda ríki. Með beitingu erlendra sameignarréttinda líkt og JTWROS kynni aðili sem er heimilisfastur hér á landi að geta svipt skylduerfingja arfi eftir sig í heild eða að hluta, þrátt fyrir að íslensk lög gildi um dánarbússkipti hans og eignin hafi verið skráð eign hins látna allt til dánardags.

Stefán Orri Ólafsson, lögmaður og eigandi á LEX skrifaði grein í Markaðinn, fylgirit Fréttablaðsins í dag þar sem hann fjallar um frumvarp til nýrra laga um markaðssvik sem ætlað er að leysa af hólmi núgildandi ákvæði laga um verðbréfaviðskipti um meðferð innherjaupplýsinga, viðskipti innherja og markaðsmisnotkun. Með fyrirhuguðum lögum verður innleidd reglugerð Evrópusambandsins og ráðsins (ESB) nr. 596/2014 um markaðssvik (MAR). Eitt þeirra nýmæla sem frumvarpið mælir fyrir um eru sérstök ákvæði um svokallaðar markaðsþreifingar (e. Market soundings). Innleiðing þessara ákvæða mun hafa talsverð áhrif á markaðsaðila hérlendis, meðal annars útgefendur skráðra fjármálagerninga, stóra fjárfesta og ráðgjafa á markaði. Markaðsaðilar þessir munu þurfa að tileinka sér nýtt formfastara verklag þegar þeir eiga samskipti á grundvelli markaðsþreifinga.

Hulda Árnadóttir, eigandi og María Kristjánsdóttir, fulltrúi rituðu kaflann um vörumerki í lyfjaiðnaði á Íslandi í ritið Pharmaceutical Trademarks 2021.

Pharmaceutical Trademarks 2021 er gefið út af Law Business research á  lexology.com

Birgir Már Björnsson, lögmaður og eigandi á LEX lögmannsstofu ritaði grein í Viðskiptamoggann í gær þar sem hann fjallar um hlutverk stjórnar samkvæmt félagarétti og bendir á að meðal þeirra ákvarðana sem stjórnendur félaga bera ábyrgð á er mat á því hvort rekstri félags sé orðið þannig háttað að ekki séu lengur uppfyllt skilyrði til að halda rekstrinum áfram. Mikilvægt er nú á fordæmalausum tímum að stjórnendur bókhaldsskyldra aðila séu meðvitaðir um athafnaskyldur sínar samkvæmt lögum um gjaldþrotaskipti og áhrif athafnaleysis þeirra við þær aðstæður. Það er jafnframt brýnt að stjórnarmenn hugi tímanlega að möguleikum til endurskipulagningar rekstrar og láti reyna á frjálsa og eftir atvikum þvingaða samninga í því skyni.

LEX lögmannsstofa er á meðal 3% íslenskra fyrirtækja sem uppfylla ströng skilyrði Viðskiptablaðsins og Keldunnar og er Fyrirmyndarfyrirtæki í rekstri árið 2020.

Umræðan um nýja stjórnarskrá hefur verið hávær. Eydís Ýr Jónsdóttir, lögfræðingur á LEX lögmannsstofu, skrifaði grein á Vísi þar sem hún fer yfir grundvallarhugtök um stjórnarskrá (hlutverk stjórnarskrárinnar), hvað er stjórnarskrá? Hvaða hlutverki er henni ætlað að gegna? Hvaða málefni eiga heima í stjórnarskránni og hvað er betra að útfæra með almennri löggjöf?